जोशीपुर बजार व्यवस्थापन समितिको आयोजनामा जोशीपुरका व्यापारीहरूलाई नेपाल सरकारको वर्तमान कर नीतिबारे अन्तरक्रियात्मक परामर्श तथा कर शिक्षा प्रदान गरिएको छ। कैलाली उद्योग वाणिज्य संघको समन्वय तथा आन्तरिक राजस्व कार्यालय, धनगढीको सहकार्यमा आयोजित कार्यक्रममा व्यवसायीहरूले कर तिर्ने क्रममा भोग्दै आएका समस्या, चुनौती तथा समाधानका उपायबारे छलफल गरिएको थियो।
जोशीपुर बजार व्यवस्थापन समितिका अध्यक्ष योगेन्द्र बमको सभाध्यक्षता तथा जोशीपुर गाउँपालिकाका अध्यक्ष चित्रबहादुर चौधरीको प्रमुख आतिथ्यतामा कार्यक्रम सम्पन्न भएको हो।जोशीपुर बजार ब्याबस्थापन समिति का सल्लाहकार धर्मेन्द्र विष्ट को स्वागत मन्तव्य सँगै शुरु भएको कार्यक्रममा जोशीपुर बजार ब्याबस्थापन समिति का पूर्व अध्यक्ष विश्व नाथ चाैधरी, व्यापारी हरी प्रसाद गौतम लगायत ले धारणा राखेका थिए।आन्तरिक राजस्व कार्यालय धनगढीका अधिकृत तर्कराज जैशीले व्यवसायीहरूलाई करसम्बन्धी प्रचलित व्यवस्था, कर दर्ता, कर विवरण बुझाउने प्रक्रिया, कर भुक्तानी तथा व्यवसाय सञ्चालनका क्रममा ध्यान दिनुपर्ने विषयमा प्रशिक्षण दिएका थिए।
जोशीपुर बजार ब्याबस्थापन समिति का अध्यक्ष योगेन्द्र बमले यस्ता अन्तरक्रियात्मक कार्यक्रमले व्यवसायी र कर प्रशासनबीचको दूरी घटाउन, करसम्बन्धी अन्योल हटाउन तथा व्यवसायीलाई कानुनी रूपमा व्यवसाय सञ्चालन गर्न सहयोग पुग्ने विश्वास व्यक्त गरे।
जोशीपुर गाउँपालिकाका अध्यक्ष चित्रबहादुर चौधरीले स्थानीय तहमै व्यवसाय कर तिर्ने सरकारी नीतिले करदातालाई सहज बनाउने उद्देश्य राखेको भए पनि यसको कार्यान्वयनमा स्थानीय तहमा थप चुनौती सिर्जना भएको बताए। उनले सरकारले वर्तमान कर नीतिअनुसार सम्पूर्ण व्यवसायीलाई प्रभावकारी रूपमा कर शिक्षा प्रदान गर्न सकेमा कर सहभागिता बढ्नुका साथै राज्यको राजस्वमा समेत वृद्धि गर्न सकिने बताए।
