बर्दगोरिया । कैलालीको बौनियाका युवा व्यवसायी तथा समाजसेवी झनक बहादुर कुँवरले रसुवामा आएको भीषण बाढीबाट प्रभावित नागरिकको राहत तथा उद्धारका लागि ५० हजार ५ रुपैयाँ सहयोग गरेका छन्।
कुँवरले उक्त रकम प्रधानमन्त्री दैवी प्रकोप उद्धार कोषमा मोबाइल बैंकिङमार्फत जम्मा गरेका हुन्। उनले विपद् तथा सामाजिक कार्यमा विगतदेखि नै सहयोग गर्दै आएका छन्।
कैलालीको बौनियामा खापर हेल्थ क्लिनिक सञ्चालन गर्दै आएका कुँवरले व्यवसायसँगै सामाजिक सेवामा पनि सक्रिय भूमिका निर्वाह गर्दै आएका छन्। क्लिनिकमार्फत गरिब, विपन्न तथा दिनदुःखी नागरिकलाई समेत स्वास्थ्य सेवा प्रदान गर्दै आएको बताइएको छ।
रसुवामा बाढी तथा पहिरोका कारण प्रभावित नागरिकको उद्धार तथा राहतका लागि सहयोग आवश्यक रहेको भन्दै कुँवरले विपद्को समयमा सबैले आ–आफ्नो क्षेत्रबाट सक्दो सहयोग गर्नुपर्ने बताए।
उनले बाढी तथा पहिरोपछि सम्पर्कविहीन रहेका नागरिकहरू सकुशल फेला पर्ने आशा व्यक्त गर्दै तत्काल खोजी तथा उद्धार कार्यलाई प्रभावकारी बनाउन सम्बन्धित निकायसँग आग्रह गरेका छन्। साथै, प्रभावित नागरिकको उद्धार, राहत तथा पुनःस्थापनामा सबै पक्षले सहयोग गर्नुपर्नेमा जोड दिएका छन्।
