कैलाली । मोहन्याल गाउँपालिकाले गाउँपालिका अन्तर्गत सञ्चालित सबै सामुदायिक विद्यालयमा विद्यालय व्यवस्थापन समिति गठन प्रक्रिया अघि बढाउन निर्देशन दिएको छ।
गाउँपालिकाको गाउँ कार्यपालिकाको कार्यालय, खिमडीले जारी गरेको पत्रमा यसअघि प्रचलित कानुनअनुसार गठन भएका विद्यालय व्यवस्थापन समितिहरूको पदावधि सकिएको जनाउँदै नयाँ समिति गठन गर्नुपर्ने उल्लेख गरिएको छ।
शिक्षा नियमावली, २०५९ को दोस्रो संशोधनमा भएको व्यवस्थाअनुसार विद्यालय व्यवस्थापन समिति गठन गर्नुपर्ने भएकाले गाउँपालिकाले मिति २०८३/०५/०२ को निर्णयअनुसार सबै विद्यालयलाई गाउँपालिकासँग समन्वय गरी प्रक्रिया अघि बढाउन अनुरोध गरेको हो।
गाउँपालिकाले तोकिएको प्रक्रिया अघि नबढाउने विद्यालयको हकमा कार्यालयबाट अनुदान निकासा गर्न बाध्य नहुने व्यहोरासमेत जानकारी गराएको छ।
विद्यालय व्यवस्थापन समिति गठनसम्बन्धी निर्णय कार्यान्वयनका लागि गाउँपालिकाले शिक्षा विभाग, सानोठिमी भक्तपुर, शिक्षा विकास तथा समन्वय इकाइ कैलाली तथा गाउँपालिकाअन्तर्गतका सबै वडा कार्यालयलाई समेत बोधार्थ पठाएको छ।
पत्रमा मोहन्याल गाउँपालिकाका प्रमुख प्रशासकीय अधिकृत कृष्णप्रसाद सापकोटाले हस्ताक्षर गरेका छन्।
