कैलालीको बर्दगोरिया गाउँपालिका–३ मा रहेको जगदम्बिके भगवती माध्यमिक विद्यालयका निवर्तमान प्रधानाध्यापक नेत्रबहादुर खड्कालाई अनिवार्य अवकाशपछि सम्मानपूर्वक बिदाइ गरिएको छ।
विद्यालयको शैक्षिक उन्नति, विद्यार्थीको भविष्य निर्माण तथा विद्यालयको समग्र विकासमा पुर्याउनुभएको योगदानको कदर गर्दै खड्कालाई शिक्षक, विद्यार्थी, अभिभावक तथा समाजसेवीहरूले सम्मानसहित बिदाइ गरेका हुन्।
खड्काले २०६३ सालदेखि विद्यालयको प्रधानाध्यापकका रूपमा जिम्मेवारी सम्हाल्नुभएको थियो। उहाँले प्रधानाध्यापकको जिम्मेवारी सम्हाल्दा विद्यालयमा कक्षा ४ सम्म मात्रै स्वीकृति रहेको थियो। उहाँको कार्यकालमा विद्यालय क्रमशः विस्तार हुँदै कक्षा १२ सम्म सञ्चालनका लागि स्वीकृति प्राप्त गर्न सफल भएको हो।
विद्यालयको शैक्षिक विकाससँगै आवश्यक भौतिक संरचना निर्माण तथा व्यवस्थापनमा समेत खड्काको महत्वपूर्ण योगदान रहेको अभिभावकहरूले बताएका छन्। उहाँको नेतृत्वमा विद्यालयले शैक्षिक तथा भौतिक क्षेत्रमा उल्लेखनीय प्रगति गरेको अभिभावकहरूको भनाइ छ।
लामो समयसम्म विद्यालयको नेतृत्व गर्दै शिक्षा क्षेत्रको विकासमा योगदान पुर्याउनुभएका खड्काको सेवाप्रति सम्मान व्यक्त गर्दै शिक्षक, विद्यार्थी, अभिभावक तथा समाजसेवीहरूले आगामी जीवन सुखमय, स्वस्थ, शान्तिपूर्ण र सफल रहोस् भन्ने शुभकामना व्यक्त गरेका छन्।
विद्यालय परिवारले पनि निवर्तमान प्रधानाध्यापक खड्काप्रति उच्च सम्मान व्यक्त गर्दै उहाँको अवकाशपछिको जीवन सुखद र सफल रहोस् भन्दै हार्दिक शुभकामना व्यक्त गरेको छ।
