खेमराज पाण्डेय, टीकापुर, कैलाली । बालबालिका केन्द्रित कार्यक्रमका लागि स्थानीय तहमा आवश्यक बजेट सुनिश्चित गर्न पैरवी तथा प्रभाव विस्तार गर्ने उद्देश्यले टीकापुरमा कार्यक्रम सम्पन्न भएको छ।
बाल कल्याण संघ टीकापुरको आयोजना तथा वर्ल्ड भिजन इन्टरनेशनल नेपालको आर्थिक सहयोगमा आयोजित कार्यक्रममा बालबालिकासँग सम्बन्धित सवाललाई स्थानीय तहको नीति, योजना तथा बजेटमा प्राथमिकताका साथ समेट्नुपर्नेमा जोड दिइएको थियो।
कार्यक्रममा भजनी नगरपालिकाका नगर प्रमुख केवल चौधरी, प्रमुख प्रशासकीय अधिकृत भोजराज भट्ट, टीकापुर नगरपालिकाका कार्यवाहक नगर प्रमुख रामबहादुर नगरजी, वडा अध्यक्ष दीर्घ ठकुल्लालगायत भजनी र टीकापुर नगरपालिकाका विषयगत शाखा तथा विभिन्न संघसंस्थाका प्रतिनिधिहरूको सहभागिता रहेको थियो।
कार्यक्रममा बालमैत्री कार्यक्रम निर्माण, आवश्यक बजेट विनियोजन तथा त्यसको प्रभावकारी कार्यान्वयनका लागि स्थानीय तह, सरोकारवाला निकाय र संघसंस्थाबीच प्रभावकारी समन्वय आवश्यक रहेको बताइएको थियो।
बालबालिकाको अधिकार, शिक्षा, संरक्षण, स्वास्थ्य तथा समग्र विकाससँग सम्बन्धित कार्यक्रमलाई स्थानीय तहको वार्षिक नीति तथा कार्यक्रममा प्राथमिकताका साथ समावेश गर्नुपर्नेमा सहभागीहरूले जोड दिएका थिए।
कार्यक्रमको सहजीकरण बाल कल्याण संघ टीकापुरका कार्यक्रम संयोजक राधिका गिरी, सामाजिक परिचालक सोनु चौधरी र धनसरा तिरुवाले गर्नुभएको थियो।
