कैलाली । अछामको बान्नीगढी जयगढ गाउँपालिकामा स्थायी ठेगाना भई हाल कामको सिलसिलामा कैलालीको टिकापुर, धनगढी लगायत विभिन्न स्थानमा अस्थायी रूपमा बसोबास गर्दै आएका सामाजिक सुरक्षा भत्ता लाभग्राही ज्येष्ठ नागरिकहरूको सहजताका लागि बान्नीगढी जयगढ गाउँपालिका–४ का वडा अध्यक्ष किरण खत्रीले घरदैलोमै पुगेर बायोमेट्रिक प्रणालीमार्फत सामाजिक सुरक्षा भत्ता नवीकरण सेवा सञ्चालन गरेका छन्।
सेवा केन्द्रसम्म पुग्न कठिनाइ हुने ज्येष्ठ नागरिकलाई लक्षित गरी सञ्चालन गरिएको अभियानबाट सयौं सेवाग्राही प्रत्यक्ष रूपमा लाभान्वित भएका छन्। घरदैलोमै सेवा पाएपछि ज्येष्ठ नागरिकहरूले खुसी व्यक्त गर्दै वडा अध्यक्ष खत्रीप्रति आभार प्रकट गरेका छन्।
वडा अध्यक्ष किरण खत्रीका अनुसार, स्थायी ठेगाना बान्नीगढी जयगढ गाउँपालिका भए पनि रोजगारी तथा अन्य कारणले कैलालीका विभिन्न स्थानमा अस्थायी रूपमा बसोबास गरिरहेका ज्येष्ठ नागरिकलाई सेवा लिन गाउँ फर्किनुपर्ने बाध्यता अन्त्य गर्ने उद्देश्यले अभियान सञ्चालन गरिएको हो।
उनले स्थानीय सरकार नागरिकको घरदैलोमै पुगेर सेवा दिनुपर्छ भन्ने मान्यताअनुसार आगामी दिनमा पनि सेवाग्राहीको आवश्यकतालाई प्राथमिकतामा राखी यस्ता जनमुखी कार्यक्रमलाई निरन्तरता दिइने बताए।
स्थानीयवासीले वडा कार्यालयको यो पहललाई उदाहरणीय र नागरिकमैत्री कार्यको रूपमा प्रशंसा गरेका छन्। उनीहरूका अनुसार यस अभियानले ज्येष्ठ नागरिकको समय, खर्च र सास्ती घटाउनुका साथै सामाजिक सुरक्षा भत्ता नवीकरण प्रक्रियालाई थप सहज र प्रभावकारी बनाएको छ।
