कैलालीको भजनी नगरपालिकामा जिल्ला परियोजना सल्लाहकार समितिले विभिन्न साझेदारी संस्थामार्फत सञ्चालन भइरहेका परियोजना तथा गतिविधिहरूको स्थलगत अनुगमन गरेको छ।
वल्र्ड भिजन इन्टरनेशनल नेपालसँगको साझेदारीमा विकासका लागि युवा एक्यबद्धता (यार्ड) धनगढी, बाल कल्याण संघ टीकापुर र दिगो विकास समाज भजनीद्वारा सञ्चालन भइरहेका विभिन्न कार्यक्रम तथा गतिविधिको अनुगमन गरिएको हो।
भजनी नगरपालिका नगरप्रमुख केवल चौधरीको संयोजकत्वमा रहेको अनुगमन टोलीले यार्ड धनगढीद्वारा सञ्चालित बालमैत्री तथा पोषणमैत्री पालिका घोषणाका लागि निर्धारित सूचकहरूको अवस्था, प्रगति, समस्या तथा आगामी आवश्यकताबारे जानकारी लिएको थियो।
अनुगमनका क्रममा आयआर्जन, बाल उत्थान, बाल संरक्षण, सामुदायिक सहभागिता, स्पोन्सरसिप, अभिभावक शिक्षा तथा कृषि उत्पादन समूहलगायतका गतिविधिको स्थलगत अवलोकन गरिएको थियो। साथै, परियोजनाबाट स्थानीय समुदाय तथा बालबालिकामा परेको प्रभावबारे लाभग्राही, अभिभावक, विद्यालय तथा कृषक समूहसँग अन्तरक्रिया गरिएको थियो।
कृषि क्षेत्रमा उत्पादन वृद्धि गर्ने उद्देश्यले दिगो विकास परियोजनाअन्तर्गत गठित सृजनशील जलवायु कृषक समूहकी अध्यक्ष लक्ष्मी चौधरीले समूहको प्रगति तथा उपलब्धिबारे अनुगमन टोलीसमक्ष जानकारी प्रस्तुत गर्नुभयो।
भजनी नगरपालिका–२ रजवराकी आरसी बालबालिकाकी अभिभावक आरतीदेवी कुमालले आफ्नो छोराको हात भाँचिएपछि परियोजनाबाट आर्थिक सहयोग प्राप्त भएको बताउनुभयो। उहाँका अनुसार उक्त सहयोगले उपचारमा ठूलो राहत पुगेको थियो।
त्यस्तै, भजनी नगरपालिका–७ स्थित गणेशमान आधारभूत विद्यालयका प्रधानाध्यापक जादोलाल रायले साझेदारी संस्थाहरूले विद्यालयको शैक्षिक तथा बालमैत्री वातावरण विकासमा उल्लेखनीय सहयोग पुर्याउँदै आएको बताउनुभयो।
अनुगमन टोलीले स्थलगत रूपमा प्राप्त सुझाव, समस्या तथा समुदायका आवश्यकतालाई सम्बन्धित पालिका तथा सरोकारवाला निकायसँग समन्वय गरी आवश्यक पहल गर्ने जनाएको छ। अनुगमनले परियोजनाका गतिविधिको प्रभावकारिता, उपलब्धि र आगामी कार्यदिशा पहिचान गर्न सहयोग पुगेको जनाइएको छ।
अनुगमन टोलीमा नगरप्रमुख चौधरीसहित स्वास्थ्य शाखा प्रमुख कैलाश थारु, विपद् व्यवस्थापन शाखा प्रमुख विष्णु राज न्यौपाने, कृषि शाखा प्रमुख गीता थापा, महिला तथा बालबालिका शाखा प्रमुख रिजु चौधरी, शिक्षा शाखा प्रमुख मिना चौधरी, पशु सेवा शाखा प्रमुख त्रिलोचन चौधरीलगायत सहभागी हुनुहुन्थ्यो।
त्यसैगरी बाल कल्याण संघ टीकापुर, यार्ड धनगढी तथा दिगो विकास समाज भजनीका प्रतिनिधिहरूको समेत सहभागिता रहेको थियो। दिगो विकास समाज भजनीबाट रामबहादुर सुनार, विनोद शाह र प्रेमा विकलगायत सहभागी हुनुहुन्थ्यो।
