कमल शाही । दैलेखको दुल्लू नगरपालिका–४ शान्तिबजारका १६ वर्षीय प्रकाश खनालको चक्कु प्रहारबाट मृत्यु भएको छ।
जिल्ला प्रहरी कार्यालय दैलेखका अनुसार फुटबल खेलेर घर फर्किँदै गरेका खनालमाथि दाहिने कोखाबाट पेटतर्फ निस्कने गरी चक्कु प्रहार गरिएको थियो। गम्भीर घाइते भएका उनलाई तत्काल दुल्लू अस्पताल लगिएको थियो। उपचारकै क्रममा उनको मृत्यु भएको जिल्ला प्रहरी कार्यालय दैलेखका प्रमुख डीएसपी गणेशबहादुर बरालले जानकारी दिनुभयो।
घटनामा संलग्न रहेको आरोपमा दुल्लू नगरपालिका–१० गमौडीका १९ वर्षीय मुकुन्द शाही र १९ वर्षीय विभूषण शाहीलाई प्रहरीले पक्राउ गरेको छ। उनीहरूलाई घटनास्थलबाट करिब १० किलोमिटर टाढा चामुण्डाको जंगल क्षेत्रबाट नियन्त्रणमा लिइएको प्रहरीले जनाएको छ।
प्रारम्भिक अनुसन्धानअनुसार एउटै किशोरीलाई मन पराउने विषयमा विवाद हुँदा घटना भएको हुन सक्ने आशंका गरिएको छ। प्रत्यक्षदर्शीका अनुसार कुनै पूर्वचेतावनी वा प्रत्यक्ष विवादबिनै पछाडिबाट एक्कासी चक्कु प्रहार गरिएको थियो।घटनापछि दुल्लू क्षेत्र स्तब्ध र शोकमग्न बनेको छ। प्रहरीले घटनाबारे थप अनुसन्धान जारी रहेको जनाएको छ।
