कमल शाही दैलेख, वैशाख २५ गते ।
नेपाल कम्युनिष्ट पार्टी (एमाले) दैलेखको जिल्ला बैठक सम्पन्न भएको छ। बैठकले वर्तमान राजनीतिक अवस्था, संविधान कार्यान्वयन, राष्ट्रियता, ऊर्जा विकास तथा प्राकृतिक स्रोतको उपयोगलगायत समसामयिक विषयमा विभिन्न धारणा सार्वजनिक गरेको छ।
बैठकले सरकार संविधानको मर्म र जनताको अपेक्षाअनुसार अघि बढ्नुपर्नेमा जोड दिँदै नागरिकका आधारभूत आवश्यकता सम्बोधन गर्न आग्रह गरेको छ। विशेषगरी आवास, खानेपानी, शिक्षा, स्वास्थ्य तथा अन्य आधारभूत सेवाहरूलाई प्राथमिकतामा राखेर प्रभावकारी ढंगले कार्यान्वयन गर्नुपर्ने धारणा बैठकले व्यक्त गरेको छ।
त्यसैगरी, दैलेखसँग सम्बन्धित अपर कर्णाली जलविद्युत् आयोजनालाई राष्ट्रिय हितअनुसार प्रभावकारी रूपमा सञ्चालन गर्न सरकारसँग माग गरिएको छ। आयोजना दीर्घकालीन रूपमा नेपालकै हितमा उपयोग हुनुपर्ने र स्थानीय समुदायले प्रत्यक्ष लाभ प्राप्त गर्ने सुनिश्चितता गरिनुपर्ने एमाले दैलेखका अध्यक्ष सूर्यबहादुर शाहीले बताउनुभयो।
उहाँका अनुसार बैठकमा दैलेखको भैरवी गाउँपालिका क्षेत्रमा मिथेन ग्यासको सम्भावना रहेको उल्लेख गर्दै पेट्रोलियम तथा ग्यास उत्खनन कार्यलाई तीव्रता दिन नेपाल सरकारसँग आग्रह गरिएको छ। विश्वव्यापी रूपमा इन्धन संकटको जोखिम बढिरहेका बेला स्वदेशी ऊर्जा स्रोतको खोज, विकास र उपयोग अपरिहार्य रहेको निष्कर्ष बैठकले निकालेको छ।
बैठकले वर्तमान राजनीतिक परिस्थितिमा लोकतान्त्रिक मूल्य–मान्यता, संसद्को प्रभावकारी भूमिका तथा नागरिक अधिकारको संरक्षणप्रति सरकार गम्भीर बन्नुपर्नेमा पनि जोड दिएको छ। लोकतान्त्रिक गणतन्त्रलाई थप सुदृढ र संस्थागत गर्न सबै राजनीतिक शक्तिबीच सहकार्य, संवाद र सहमतिका आधारमा अघि बढ्नुपर्ने धारणा बैठकले व्यक्त गरेको छ।
