कमल शाही। कर्णाली प्रदेशका युवाहरूको साझा मञ्चका रूपमा स्थापित कर्णाली युवा महोत्सव को दोस्रो संस्करण वैशाख १९ र २० गते वीरेन्द्रनगर सिटी हल मा आयोजना हुने भएको छ।
आयोजक समितिका संयोजक विनोदकुमार शाहीका अनुसार महोत्सव मनोरञ्जनमा मात्र सीमित नरही युवाहरूको बौद्धिक, सामाजिक तथा सांस्कृतिक विकासमा केन्द्रित रहनेछ। कर्णाली प्रदेशका सबै जिल्ला तथा स्थानीय तहबाट युवाहरूको सहभागिता रहने यस कार्यक्रममार्फत विकास, शिक्षा, स्वास्थ्य र स्वरोजगारका विषयमा गहन छलफल गरिनेछ।
महोत्सवमा कर्णालीको रैथाने कला संस्कृति, देउडा खेल तथा विविध सांगीतिक प्रस्तुतिहरू समेटिने छन्, जसले युवाहरूलाई आफ्नो पहिचानसँग जोड्ने अपेक्षा गरिएको छ। साथै, कर्णालीलाई राष्ट्रिय तथा अन्तर्राष्ट्रिय स्तरमा चिनाउन योगदान पुर्याएका उत्कृष्ट १० जना युवालाई ‘कर्णाली युथ आइकन अवार्ड’ प्रदान गरिने कार्यक्रम तय गरिएको छ।
यसैगरी, पैकेलो माथि पुस्तकमा अन्तर्क्रिया तथा समसामयिक विषयहरूमा विज्ञहरूसँग ‘युथ संवाद’ कार्यक्रम सञ्चालन गरिने आयोजकले जनाएको छ।
महोत्सव युवाहरूको प्रतिभा प्रस्फुटन गर्ने साझा मञ्चका रूपमा रहने विश्वास गरिएको छ। युवाहरूमा निहित सृजनशीलता, नेतृत्व क्षमता र ऊर्जालाई उजागर गर्दै राज्यको विकास प्रक्रियामा उनीहरूको सक्रिय सहभागिता सुनिश्चित गर्नु यसको मुख्य उद्देश्य रहेको आयोजकले जनाएको छ।
साथै, कर्णालीको पर्यटन प्रवर्द्धन, पूर्वाधार विकास र सामाजिक रूपान्तरणमा युवाहरूको भूमिकाबारे स्पष्ट दिशानिर्देश दिने अपेक्षा गरिएको छ।
