कमल शाही। दैलेखको चामुण्डा बिन्द्रासैनी नगरपालिका–जम्बुकाँध, दैलेखमा चामुण्डा प्रिमियर लिग (CPL) सिजन–२ आयोजना हुने भएको छ। चामुण्डा बिन्द्रासैनी स्पोर्ट्स एकेडेमीको आयोजनामा सञ्चालन हुन लागेको उक्त क्रिकेट प्रतियोगिता यहीँ २०८३ जेठ ४ गतेदेखि ७ गतेसम्म सञ्चालन गरिने जनाइएको छ।
एकेडेमीले सार्वजनिक गरेको सूचनाअनुसार प्रतियोगिता बिन्द्रासैनी खेल मैदानमा सञ्चालन हुनेछ। प्रतियोगितामा सहभागी हुन इच्छुक टोलीहरूलाई समयमै दर्ता गराउन अनुरोध गरिएको छ।
प्रतियोगितामा प्रथम हुने टोलीले नगद रु. ९०,०००, द्वितीय हुने टोलीले रु. ४५,०००, तृतीय हुने टोलीले रु. २५,००० तथा सान्त्वना पुरस्कार स्वरूप रु. १५,००० प्राप्त गर्नेछन्। सहभागी हुन चाहने टोलीका लागि दर्ता शुल्क रु. ४,५०० तोकिएको छ।
प्रतियोगितामा प्रत्येक टिमले १५ जना खेलाडी समावेश गर्नुपर्नेछ भने कम्तीमा ११ जना खेलाडी मैदानमा उतार्नुपर्ने व्यवस्था गरिएको छ। खेल ICC को नियमअनुसार सञ्चालन हुने र विवादका विषयमा आयोजकको निर्णय अन्तिम हुने जनाइएको छ।
त्यस्तै, खेल अवधिभर खेलाडीहरूलाई सामान्य प्राथमिक उपचारबाहेक अन्य जिम्मेवारी सम्बन्धित टोलीकै हुने, साथै यातायात, खाना तथा आवासको व्यवस्था टोली स्वयंले गर्नुपर्ने उल्लेख गरिएको छ।
टिम दर्ता २०८३ जेठ २ गते साँझ ५ बजेसम्म गर्न सकिने आयोजकले जनाएको छ। प्रतियोगिता १२ ओभरको टेनिस बल क्रिकेटमा आधारित रहनेछ।
थप जानकारीका लागि आयोजकलले सम्पर्क नम्बर पनि सार्वजनिक गरेको छ।
