धनगढी, कैलाली —स्वास्थ्य कार्यालय धनगढी, कैलालीको आयोजनामा सम्पन्न जिल्लास्तरिय वार्षिक स्वास्थ्य समीक्षा गोष्ठी–२०८२ मा बर्दगोरिया गाउँपालिकाले उत्कृष्ट प्रदर्शन गर्दै जिल्लाभर रहेका १३ स्थानीय तहमध्ये दोस्रो स्थान हासिल गर्न सफल भएको छ।
दुईदिने गोष्ठीको औपचारिक उद्घाटन सामाजिक विकास मन्त्री माननीय मेघराज खड्काको प्रमुख आतिथ्यतामा सम्पन्न भयो। कार्यक्रम मार्फत आर्थिक वर्ष २०८१/०८२ मा प्रत्येक स्थानीय तहले स्वास्थ्य क्षेत्रका विभिन्न कार्यक्रम तथा सूचकहरुमा हासिल गरेको प्रगति सार्वजनिक गरिएको थियो।
मूल्यांकनका आधारमा बर्दगोरिया गाउँपालिकाले स्वास्थ्य सेवा विस्तार, मातृ–शिशु स्वास्थ्य, खोप अभियान, पोषण कार्यक्रम, रोग नियन्त्रण, प्रशासनिक व्यवस्थापन लगायतका सूचकहरूमा सन्तोषजनक उपलब्धि हासिल गर्दै जिल्लाको दोस्रो उत्कृष्ट स्थानीय तह बन्न सफल भएको स्वास्थ्य कार्यालयले जानकारी दिएको छ।
स्वास्थ्य क्षेत्रको समग्र सुधारमा बर्दगोरिया गाउँपालिकाले देखाएको सक्रियता र उपलब्धिलाई सराहना गर्दै आगामी दिनमा अझ परिणाममुखी कार्यक्रम कार्यान्वयन गर्न सम्बन्धित निकायलाई सुझावसमेत दिइएको थियो।
