कैलाली, — अध्यात्म र समाजसेवामा क्रियाशील सन्त निरंकारी मण्डल नेपाल ले नेपालमै पहिलो पटक प्रादेशिक नारी सन्त समागम आयोजना गर्ने भएको छ।
आगामी चैत १३ गते सुदूरपश्चिम प्रदेशको बौनियाँ, कैलालीबाट सुरु हुने उक्त समागम कर्णाली, मधेश र कोशी प्रदेशमा फरक–फरक मितिमा सञ्चालन गरिने आयोजकले जनाएको छ। यसबारे बौनियाँमा आयोजित पत्रकार सम्मेलनमार्फत जानकारी दिइएको हो।
समागममार्फत मिशनको आध्यात्मिक विचारधारालाई जनस्तरसम्म पुर्याउने तथा नारी शक्तिमार्फत समाजमा शान्ति, सद्भाव र एकताको सन्देश फैलाउने उद्देश्य राखिएको छ। आयोजकका अनुसार कार्यक्रमले नारी सशक्तिकरणमा महत्वपूर्ण योगदान पुर्याउने विश्वास गरिएको छ।
समागममा आध्यात्मिक प्रवचन, भजन–कीर्तन तथा नारी सशक्तिकरणसम्बन्धी विविध विषयमा छलफल गरिनेछ। कार्यक्रममा सुदूरपश्चिम, कर्णाली, मधेश र कोशी प्रदेशका हजारौं श्रद्धालु तथा जिज्ञासुहरूको सहभागिता रहने अपेक्षा गरिएको छ।
सन्त निरंकारी मण्डल नेपालका अनुसार उक्त समागमले समाजमा विद्यमान जाति, धर्म र नस्लका विभाजनलाई कम गर्दै मानवतालाई एकताको सूत्रमा बाँध्ने लक्ष्य लिएको छ।
