जानकी गाउँपालिकामा संचालनमा रहेको सेवक नेपाल – समावेशी परियोजना अन्तर्गत अपाङ्गता भएका बालबालिकाको सिकाइ तथा समावेशी शिक्षाको अवस्थाको संयुक्त अनुगमन गरिएको छ।
अनुगमन टोलीमा गाउँपालिका अध्यक्ष गणेश चौधरी, शिक्षा शाखा प्रमुख धर्मान्नद कपाडी, महिला बालबालिका विकास शाखा प्रमुख यमुना विष्ट, सेवक नेपाल क्षेत्रीय संयोजक अरुण चौधरी, परियोजना संयोजक प्रेम चौधरी लगायतको सहभागिता रहेको थियो।
अनुगमनको क्रममा अपाङ्गता भएका बालबालिकाको घरमा आधारित सिकाइ सहयोग, अपाङ्गता सहायक सामग्रीको प्रयोग, समावेशी सिकाइका लागि शिक्षकको क्षमता विकास, साथै डिजिटल तथा मुद्रण सामग्रीको उपलब्धता र प्रयोगको प्रगति जाँच गरिएको थियो।
यस अनुगमनलाई वडा नं. १, २, ४ र ९ मा केन्द्रित गरी सम्पन्न गरिएको थियो। सहभागी टोलीले बालबालिकाको सिकाइ, अनुभव र अभ्यासको अवलोकन गर्दै समावेशी शिक्षालाई थप प्रभावकारी बनाउने उपायहरूमा समिक्षा गरेको बताइएको छ।
सेवक नेपालको सहयोग र आयोजनामा भएको यस अनुगमनले जानकी गाउँपालिकामा समावेशी शिक्षाको अवस्था सुधार गर्न रणनीति र कार्यान्वयनको दिशा निर्धारणमा सहयोग पुर्याउने विश्वास व्यक्त गरिएको छ।
