कमल शाही दैलेख, जेठ ११ गते दैलेखको चामुण्डाबिन्द्रासैनी नगरपालिका वडा नं. १ पाल्तमा संघीयतापछि पहिलोपटक सञ्चालन गरिएको राष्ट्रपति महिला उत्थान जीविकोपार्जन कार्यक्रमअन्तर्गत २५ जना महिला दिदीबहिनीहरूलाई बिउपूँजी स्वरूप बाख्रा वितरण गरिएको छ।
महिलाहरूको आर्थिक सशक्तीकरण, स्वरोजगार प्रवर्द्धन तथा आयआर्जन वृद्धि गर्ने उद्देश्यले कार्यक्रम सञ्चालन गरिएको हो। कार्यक्रममार्फत विपन्न तथा आयआर्जनका अवसरबाट वञ्चित महिलाहरूलाई आत्मनिर्भर बनाउने लक्ष्य राखिएको नगरपालिकाले जनाएको छ।
उक्त कार्यक्रमको संयोजक नगरपालिकाकी उपप्रमुख मनसरा कुमारी शर्मा रहेकी छन्। उपप्रमुख शर्माले कार्यक्रममा उपस्थित भई लाभग्राही महिलाहरूलाई बाख्रा वितरण गरेकी हुन्।
कार्यक्रममा सहभागी महिलाहरूले बाख्रापालनमार्फत घरायसी आयआर्जनमा टेवा पुग्ने विश्वास व्यक्त गरेका छन्।
साथै, यस चरणमा छुट्नुभएका अन्य दिदीबहिनीहरूलाई आगामी चरणमा पुनः कार्यक्रमअन्तर्गत समावेश गरिने जानकारी समेत दिइएको छ।
स्थानीय तहले महिलाहरूको आर्थिक सशक्तीकरण र जीविकोपार्जन सुधारका लागि यस्ता कार्यक्रमलाई आगामी दिनमा पनि निरन्तरता दिने जनाएको छ।
