कमल शाही । सुर्खेतबाट दैलेखतर्फ जाँदै गरेको इभी हाइस दैलेखमा दुर्घटना भएको छ । जिल्ला प्रहरी कार्यालय दैलेखका अनुसार कर्णाली प्रदेश ०२–००१ ज ०८६२ नम्बरको ईभी हाइस शुक्रवार साँझ ४ ५० बजे गुराँस गाउँपालिका–४ रिठा नजिक सडकमा पल्टिएको हो।
गाडी चालक दैलेख गुराँस गाउँपालिका–४ रतिखोलाका २२ वर्षीय मनिस शाहीले चलाउँदै आएको उक्त गाडी ब्रेक फेल भई दुर्घटनामा परेको प्रारम्भिक अनुसन्धानबाट खुलेको प्रहरीले जनाएको छ।
दुर्घटनाका बेला गाडीमा चालक र सहचालकसहित १३ जना सवार थिए । तीमध्ये दैलेख नारायण नगरपालिका–१ लोकतान्त्रिक चोककी ३६ वर्षीया संगिता राना मगर घाइते भएकी छन् । उनको हातखुट्टामा सामान्य चोट लागेको र उपचारका लागि सुर्खेत पठाइएको प्रहरीले जनाएको छ।
अन्य १२ जना यात्रु सकुशल रहेका छन्। चालकले मादक पदार्थ सेवन नगरेको र सवारीका कागजपत्र समेत साथमै रहेको प्रहरीले जनाएको छ।
दुर्घटनास्थलमा अस्थायी प्रहरी पोष्ट घोडाबासबाट प्रहरी सहायक हवल्दार कृष्णनाथ योगीको कमाण्डमा तीन जनाको टोली खटिएको थियो। उक्त स्थान प्रहरी पोष्टबाट करिब ४ किलोमिटर उत्तरतर्फ पर्छ।
घटनाबारे थप अनुसन्धान भइरहेको प्रहरीले जनाएको छ।
