बर्दगोरिया, कैलाली। कैलालीको बर्दगोरिया गाउँपालिका–२ मा रहेको आदर्श सामुदायिक विद्या मन्दिरले शिक्षासँगै विद्यार्थीहरूमा नैतिक मूल्य, संस्कार र सांस्कृतिक चेतनाको विकासलाई समेत प्राथमिकता दिँदै आएको छ।
हिन्दु धर्मावलम्बीहरूको महान् पर्व शुभ दीपावलीलाई लक्षित गर्दै विद्यालयले विद्यार्थीहरूबीच विभिन्न सांस्कृतिक तथा सिर्जनात्मक गतिविधि सञ्चालन गरेको छ। यसैक्रममा विद्यार्थीहरूले आकर्षक रंगोली तयार गर्नुका साथै चाडपर्वको महत्त्व, परम्परा र संस्कारबारे जानकारी आदानप्रदान गरेका छन्।
विद्यालयले साना बालबालिकालाई समेत चाडपर्वको धार्मिक, सांस्कृतिक तथा सामाजिक महत्त्वबारे जानकारी गराउँदै आफ्ना अनुभव र विचार व्यक्त गर्ने अवसर प्रदान गरेको थियो। यस्ता गतिविधिले बालबालिकामा आफ्नो संस्कृति, परम्परा र मौलिक पहिचानप्रति सम्मानभाव विकास गर्न सहयोग पुग्ने विद्यालयको विश्वास छ।
विद्यालयका प्रिन्सिपल विकास थापाका अनुसार सानै उमेरदेखि बालबालिकालाई शिक्षासँगै संस्कार र नैतिक मूल्य सिकाउनु आवश्यक छ। उनले भने, “बालबालिकाको जीवनमा शिक्षासँगै संस्कारलाई पनि पहिलो प्राथमिकतामा राख्नुपर्छ। हाम्रो विद्यालयले यो वर्ष मात्रै नभई हरेक वर्ष यस्ता सांस्कृतिक तथा सिर्जनात्मक गतिविधि सञ्चालन गर्दै आएको छ।”
कार्यक्रमअन्तर्गत चारवटा सदनबीच रंगोली प्रतियोगितासमेत आयोजना गरिएको थियो। प्रतियोगितामा विद्यालयका चारवटै सदनले सहभागिता जनाएका थिए। प्रतियोगिताको अन्तिम नतिजा केही दिनभित्र सार्वजनिक गरिने विद्यालय प्रशासनले जनाएको छ।
पाठ्यपुस्तकको ज्ञानसँगै व्यवहारिक जीवनमा आवश्यक संस्कार, संस्कृति र नैतिक शिक्षालाई जोड दिँदै विद्यालयले सञ्चालन गरेको यस्तो अभ्यासले विद्यार्थीहरूको सर्वाङ्गीण विकासमा सकारात्मक योगदान पुर्याउने अपेक्षा गरिएको छ।
