कैलाली । घोडाघोडी नगरपालिका–१० मा रहेको कलम बम मेमोरियल इङ्लिस स्कुल (KBM School) मा NCC क्याडेटहरूका लागि सञ्चालन भइरहेको तीनमहिने तालिमअन्तर्गत निरीक्षण तथा मूल्याङ्कन कार्यक्रम सम्पन्न भएको छ।
विद्यार्थीहरूमा अनुशासन, नेतृत्व क्षमता, आत्मविश्वास तथा राष्ट्रप्रेमको भावना विकास गर्ने उद्देश्यले सञ्चालन भइरहेको तालिमअन्तर्गत आज विशेष निरीक्षण तथा मूल्याङ्कन कार्यक्रम आयोजना गरिएको हो।
विद्यालयका संस्थापक तथा प्रिन्सिपल युवराज बमको सभापतित्वमा सम्पन्न कार्यक्रममा देवीदल गणका प्रमुख सेनानी राजकुमार महत प्रमुख अतिथिका रूपमा तथा देवीदल गणका सेनानी उत्तरबहादुर चन्द विशिष्ट अतिथिका रूपमा उपस्थित रहेका थिए।
कार्यक्रममा NCC क्याडेटहरूले तालिमका क्रममा सिकेका विभिन्न अनुशासन, नेतृत्व तथा व्यवहारिक अभ्यासहरू प्रस्तुत गरेका थिए। निरीक्षण तथा मूल्याङ्कनका क्रममा क्याडेटहरूको अनुशासन, प्रस्तुति, नेतृत्व क्षमता र तालिमको प्रगतिबारे अवलोकन गरिएको थियो।
तीनमहिने NCC तालिमले विद्यार्थीहरूलाई अनुशासित, आत्मविश्वासी र जिम्मेवार नागरिकका रूपमा विकास गर्न महत्वपूर्ण योगदान पुर्याउने विद्यालयले जनाएको छ।
“अनुशासन सिक्दै, नेतृत्व गर्दै, राष्ट्रसेवाका लागि तयार हुँदै” भन्ने भावनासहित NCC तालिमले विद्यार्थीहरूमा देशप्रतिको जिम्मेवारी र सेवाभाव विकास गर्ने अपेक्षा गरिएको छ।
