भजनी, कैलाली । रसुवामा आएको विनाशकारी बाढीबाट प्रभावित परिवारहरूको राहत तथा उद्धारका लागि भजनी नगरपालिका–८ स्थित च्याम्पियन समूहले ८ हजार ६ सय १५ रुपैयाँ आर्थिक सहयोग गरेको छ। 
नेपाल रेडक्रस सोसाइटी, कैलाली जिल्ला शाखाअन्तर्गत भजनी–८ मा गठित च्याम्पियन समूहले समुदायबाट रकम संकलन गरी बाढीपीडितको राहतका लागि सहयोग गरेको हो।
नेपाल रेडक्रस सोसाइटी कैलाली जिल्ला शाखाको आयोजनामा भजनी–८ का सोनाफाँटा, खल्लाटोल र काढाढीक गरी तीन समुदायमा ‘जीविकोपार्जन र जैविक विविधताका लागि समुदायको सशक्तीकरण (ECOLAB) परियोजना’ सञ्चालन भइरहेको छ।
सोही परियोजनाअन्तर्गत समुदायका अगुवा कार्यकर्ताहरू छनोट गरी च्याम्पियन समूह गठन गरिएको हो। समूहले विपद्को समयमा समुदायबाट सहयोग संकलन गरी रसुवा बाढीपीडितका लागि आर्थिक सहयोग गरेको जनाएको छ।
च्याम्पियन समूहको उक्त सहयोगले बाढीबाट प्रभावित परिवारको राहत तथा उद्धारमा केही टेवा पुग्ने विश्वास गरिएको छ।
