कमल शाही। दैलेखको नौमुले गाउँपालिका–५ गजमालीमा छोरीले कुटपिट गर्दा ६५ वर्षीय धनबहादुर रामजाली मगरको मृत्यु भएको छ। २२ गते साँझ घरमै मदिरा सेवन गरी कुटपिट गरेपछि घाइते बुवाको उपचारको क्रममा मृत्यु भएकोे हो ।
प्रहरीका अनुसार विवाहविच्छेद भई माइत बसेकी २७ वर्षीया तिर्सना रामजाली मगरले मदिराको नशामा काठको चिरपटले टाउकोमा प्रहार गरेपछि धनबहादुर गम्भीर घाइते भएका थिए। घाइतेलाई तत्काल प्राथमिक स्वास्थ्य केन्द्र नौमुले पुर्याइए पनि उपचारका क्रममा साँझ सोही दिन साझ मृत्यु भएको प्रहरीले जनाएको छ।
घटनास्थल प्रहरी निरीक्षक राजकुमार थापाको कमाण्डमा पाँच जनाको टोली खटिएको थियो। घटना स्थल जि.प्र.का. नौमुले कार्यालयबाट करिब २ किलोमिटर उत्तर–पूर्वमा पर्ने जनाइएको छ।
मृतकको शव पोस्टमार्टमका लागि प्राथमिक स्वास्थ्य केन्द्र नौमुलेबाट राति ८:१५ बजे जिल्ला अस्पताल दैलेख लगिएको छ। कुटपिटमा संलग्न तिर्सना रामजाली मगरलाई आवश्यक अनुसन्धानका लागि जिल्ला प्रहरी कार्यालय दैलेखले पक्राउ गरी नियन्त्रणमा राखेको छ।
