भाई टिकाको राति देखी भोलिपल्ट दिनभर लाग्ने उक्त मेलाको अवसरमा रातभर बस्तेकोट क्षेत्रका विभिन्न ७ वटा गाउँटोलहरुमा घरघर भैली खेल्ने र विहान भएपछि खापरस्थान मन्दिरमा पुगि वृहतरुपमा भैली खेल्ने परम्परागत प्रचलन विद्यमान छ । तर विगतका दिनहरुमा उक्त प्रचलनमा केहि कमी आए पनि यतिबेला स्थानिय युवाहरुको सक्रियताका कारण भैलीमेलाले सार्थकता पाएको छ ।
चामुण्डाबिन्द्रासैनी नगरपालिका वडा नं. ५ को समन्वयमा बस्तेकोट क्षेत्रका युवाहरु एक हुँदै सहयोग रकम संकलन गर्दै भैली र मेलालाई व्यवस्थापन गरिएको छ । जसले गर्दा लोपहुन लागेको भैली परम्परा लगाएत खापरस्थान मेलाको रौनकतामा वृद्धि भएको छ । उक्त भैलीमेलालाई व्यवस्थापन गर्न युवाहरुको ठुलो साथ सहयोग र भुमिका रहनुका साथै आफुहरुले समेत ठुलो जिम्मेवारी महशुस गरेको भैली मेला व्यवस्थाप मुल समितिका अध्यक्ष मिलन कार्की तथा उपाध्यक्ष लक्ष्मी रेग्मीको भनाई रहेको छ ।
त्यसो त वडा कार्यालयले समेत उक्त भैलीमेला लाई व्यवस्थापनमा आवश्यक सहकार्य गरेको छ । वडा भित्रका हरेक सँस्कृतिहरुलाई व्यवस्थापनका लागि युवाहरुको माग बमोजिम आर्थिक सहयोग लगाएत कामहरु गरेको वडाध्यक्ष हस्त प्रसाद शर्माले बताउनुभयो । उक्त भैली मेलाको संयोजक जय बहादुर कार्की रहनुभएको थियो ।
यसरी पछिल्लो समय लोपहुदैँ गरेका हरेक सँस्कृति संरक्षण लगाएत सकारात्मक गतिविधिमा युवाहरुको हातेमालो र चासो लाई सकारात्मक रुपमा लिदैँ राज्यका हरेक गतिविधिहरुमा युवाहरुलाई समाहित गर्न सके समुन्नत समाजको निर्माण हुनेमा दुई मत छैन ।
