कैलालीको बर्दगोरिया गाउँपालिकाले देहावसान सहानुभूति अभियान थालेको छ । यो अभियान अन्तर्गत मानिसको स्वर्गारोहणपछि पार्थिव शरीरलाई आर्यघाट सम्म लैजान निःशुल्क महाप्रस्थान यान शव वाहन सेवा सञ्चालन गरेको छ भने देहावसान भएका व्यक्तिका आफन्तलाई सहानुभूति स्वरूप दश हजार दिने गरेको छ ।
शुक्रवारबाट अभियान सुरु गरेको गाउँपालिकाले सुरु दिनमा दुई परिवारलाई सहानुभूति व्यक्त गरेको छ । वडा नम्बर २ बौनियाका मृतक रम्भादेवी लुहारका छोरा कालु लुहार र वडा नम्बर १ कट्टीपुरका मृतक एक ६ दिने शिशुका बाबु सुवास नेपालीलाई दश हजारका दरले सहानुभूति रकम समेत वितरण गरेको छ । अभियानको पहिलो दिन कालु लुहारलाई गाउँपालिकाका अध्यक्ष कर्णबहादुर कुँवर र सुवास नेपालीलाई वडा नम्बर १ का वडाध्यक्ष एवम् गाउँ सरकारका प्रवक्ता मिथुन गौतमले घरमै पुगेर सहानुभूति प्रदान गरे ।
गाउँ सरकारको सहानुभूति आफूहरूको पीडामा मलहम बनेको लाभग्राहीले प्रतिक्रिया दिएका छन् । यो अभियानले पार्थिव शरीरलाई आर्यघाट सम्म लैजान सवारी साधन खोज्नु पर्ने र अन्य सामाग्रीहरू किन्न पैसा नहुँदा आइपर्ने समस्याको अन्त्य भएको उनीहरूको भनाई छ ।
“मान्छे मरेपछि केमा लैजाने, कसरी लैजाने, सवारी साधनमा तेल कसरी हाल्ने, सधैँ पैसा नहुन सक्छ पैसा को सँग माग्ने भन्ने सारै तनाव हुने गरेको मैले देखेको छु । यती मात्र होइन धार्मिक संस्कार अनुसारका अन्य सामाग्रीहरू कसरी किन्ने, पैसाको जोहो कसरी गर्ने भन्ने चिन्ता पनि हुन्थ्यो । तर गाउँपालिकाले थालेको यो अभियानले निःशुल्क शव वाहन त पाइयो नै अनि अन्य खर्चका लागी पनि १० हजार पनि पाइयो । धन्यवाद छ गाउँपालिकालाई, सरकार भनेको यस्तै हुनुपर्छ ।” मलामी जान हिँडेका स्थानीय भरिजन मिजारले भने ।
जनताको पीडामा आफू भएको अनुभूति गर्दै आइपर्ने विभिन्न समस्यामा सहजीकरण गर्ने उद्देश्यले यो अभियान सुरु गरेको गाउँपालिकाका अध्यक्ष कर्णबहादुर कुँवरले बताए । निर्भीक पोष्टलाई प्रतिक्रिया दिँदै उनले भने,… “पालिका प्रमुखको हैसियतले मेरो पालिकाका हरेक नागरिकको समस्या मेरो समस्या हो । नागरिकका यस्ता समस्यालाई क्रमिक रूपमा समाधान गर्दै लैजाने दिशामा हामी लागेका छौ ।” देहावसान सहानुभूति अभियान अन्तर्गत निकट भविष्यमा शव चिस्यान सेवा समेत सुरु गर्ने उनले जनकारी दिएका छन् ।
देहावसान सहानुभूति अभियान “देहावसान सहानुभूति अभियान”
